Wednesday, May 23, 2007

عن الفترة الزمنية الي مكنتش علي النية


بمناسبة موسم الأمتحانات و المحن و الاستثناءات

و محدش مركز غير في الكتب و المذكرات




مألكمش البحر عندنا أيه



حكاية



بنزل كل يوم أصلي الفجر اوخدلي روندايا



تحس أنك بتتمشي في بلكونة بيتكم
فاضي و جميل وتسمع صوت الموج بجد




وطبعا صوت فرامل الجماعة الشاربين



و ضحكات صبايا بعد منتصف الليل الي هيا



هيهيهيهيهيييييييييييي



مش كدة يابو أشرف



و هو ده الي بيدي الطابع الأكثر جمالاوخصوصية لمدينة الأسكندرية في
هذه الفترة الزمنية



وهو ده الي أحنا بنتكلم عليه مفيش عولمة

حتي قالولك أيه ؟

مفيش شعارات دينية في الانتخابات البرلمانية

يعني نسميها عولمة يابيه

قالولك لأ
أمل نسميها أيه
مع أن العولمة خدناها السنة الي فاتت صفحة 114في كتاب الدرسات الاجتماعية
هي عدم خلط السياسة بالدين

ما عالينا

بس أخونا بتوع الاخوان قالو لو علي الشعارات الدينية سهلة وأتبعو مبدأ

عمال مصر الاحرار هيلا هيلا بصو علي الحيطة

في محاولة ارضاءهم للخواجة

و قالولك حنخليها الي بالي بالك هو الحل

سبها علي ربنا

أما عن مفتي منتجات الالبان و المهلبية و تحت شعار

راحت عليكي يا بقرة وراح زمنك يا جموسة

لك أن تتخيل عزيزي المواطن أن كلنا حنبقي أخوات بعيدا عن دواخل الحوار و أن الحوار هايف و الراجل أعتذر
و يشكر أه أعتذر

بس ده فعلا اكبر توضيح للفترة الزمنية

Thursday, May 17, 2007

تاج

تاج من الأخت البتاع
-----------------------------------
أحب شخص لقلبك فى الدنيا؟
لو في مكنتش أبقي تعبان
---------------------------
انسان مستعد تضحي بحياتك – ركز فى كلمة حياتك - عشانه؟
-الي ممكن يضحي بحياتو عشاني
---------------------------
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
نفسي(دماغي) لان محدش تاعبني غيرها
-----------------------------
ما هو:اسم أجمل كتاب كتبه بشر قرأته ومحتفظ به حتى الان؟
أولاد حارتنا لنجيب محفوظ
-----------------------------
اسم كتاب -كتبه بشر برضة- انت متعلق بيه وبتقرأه كل فترة؟
رباعيات صلاح جاهيين
--------------------------------
اهم جهاز منزلى انت متعلق بيه او بتستخدمه كتير؟
الكمبيوتر
--------------------------------
مكان تحس بالراحة عندما تدخله؟
البحر حتي لو كنت في عوامة مش في مركب
--------------------------------
شىء تحس بالراحة النفسية عندما تنظر اليه؟
حجات كتير
طفلة صغيرة عمرها اسبوع
القمر و هو هلال
الموج وهو بياكل الشط و يرجع تاني
وش أنسان طيب
كتيييييير
-----------------------------
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
أي سكة سفر
-----------------------------
اجمل مدينة زرتها داخل مصر ؟
قاهرة المعز بدين الله الفاطمي
الحسين
------------------------
أجمل مكان طبيعي رأيته داخل مصر ؟
أسكندراني يلا و البحر عمي و النيل كمان يجري في دمي
أكيد البحر
-----------------------
شخصية كارتونية بتحبها؟
تويتي
------------------------
نوع هاتفك المحمول؟
nokia3230
----------------------------
سرعة بروسيسور جهازك؟
3.01ghz
------------------------
حجم ذاكرة –هارد- جهازك؟
120
---------------------------
المساحة التى تشغلها المواد الاسلامية على جهازك؟
2gb
-----------------------------
نفس المساحة السالف ذكرها فى قلبك -الاجابة لنفسك عشان الرياء يا اخواننا -؟
صراحة مش كتبر
يعني الي يكفيني بالعافية
و ربنا يهدي
-----------------------------
أهم هدف انت واضعه لحياتك الآن؟
أكون أنسان محترم
محترم
-----------------------------
مواصفات فتاة الأحلام بالنسبة لك؟
متجيش
فعلا امنية حياتي مأبلهاش لأن فتاة أحلامي يعني جواز و جواز يعني أولاد و أولاد يعني هذا ما جناه عليا أبي و ما جنيت علي احد؟
------------------------------
صف ما يأتى:شعورك لما بتسمع كلمة مصر ؟
بخاف عليها من نفسي ومن بكرة و بحمد ربنا علي أمبارح الي عدا
----------------------
شعورك لما بتسمع كلام عن اليهود؟
أرفع القبعة
حلمو ووصلو للي حملوبيه
من لا ارض لا قوة لا لا لا
لي........... في فترة وجيزة
-----------------------
شعورك لما بتشوف ظابط شرطة؟
فعلا بحس بأنه في الأول أو في الآخر أنسان
مش من عالم تاني يعني
-----------------------
شعورك لما بتشوف الكناس العجوز فى الطريق؟
ذنب كبيييير أوي
بحس ان كيس الشبسي الي بشايله ده بتاعي أنا الي راميه
بالرغم أني مبرميش حتي عقب سجارة
رأيكم أروح أتعالج من الوسواس ده
و لا أرمي أنا كمان و أخلص
و الناس هما الي ميرموش
--------------------------
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
هو حر يلبس جلابية و لا شرت و انا حر ألبس الي ألبسه و هي حرة تلبس الي تلبسه برده
بس مش عايز أفتي
-----------------------------
احساس يراودك فى اشارة مرور مغلقة بسبب مسئول كبير؟
بغني أغنية علشان اضيع وقتي
يا ليل طول يا ليل وخليك قاعد شوية
قول للصبح استني .................بذمتكم مش لازم الواحد يبقي مؤدب
----------------------------------
بالنسبة لتمرير التاج؟؟؟؟؟
بيني و بيني
الباقي كله مشغول في الامتحنات
كمان الطيب أحسن

Sunday, May 6, 2007

عصفور صغير



رايحين علي فين يا بلد رايحين


الشعب كله حزين


مليان آنين


حتي الطيور علي الشجر بقو محبوسين


في كل شارع معتقل وكام سجين


رايحين علي فين يا بلد رايحين


الناهردة فتحت باب القفص لعصفوري الصغير


كان مقتنع أنه جوة القفص حر مش أسير معنه شايف الحمام قدامه بيطير

أنا عارف أن الي عملته ده ممكن يأذيه أو يخلي حد يبيعو وحد يشتريه

بس أبقي عملت الي عليا و هو حر يقعد أو يطير

لأ مش ححطله خط و أله ألزم حدودك ده برده يبقي سجن بس سجن كبير