لفلسطين من قلبي سلام

غزة الحلم ام غزة الكابوس

عفوا

انا متضامن مع غزة

العالم منتهاش

بوش

لو تعرف انت اه بالنسبالي
كنت قلعت الجزمة و أدتهالي


انا مش زعلان غير علي الجزمة
طبقها زي مطبق دم العرب وخيرهم

أرض التناقض

انا حر زي الشجر جزره زاده وزواده
عايش مهما حصل ولو الكل ماتو

انا حر زي القمر يختفي بأوقاته
مهما يكون طوري نوري يحي الليل وماماته

انا ليلي لو كان حزين بيعدي وبطوله
يطلع نهاره عيد و اضحك علي زهوله

بس
مش عارف
مش فاهم
مش حاسس
انا صح انا غلط
انا ليه
كلها انا و اعوذ بالله من الأنا
بس مش مهم
كله بيفوت طول ما بنعبد المعبود
كل سنة و انتم أطيب و أقرب الي الله

عايز حقي

وزير الاستثمار: توزيع الاسهم المجانية على 20 مليون مواطن..ولا تفرقة بين مصرى واخر

حالة من الذهول أصابت رجل الشارع المصري بعدما عرضت الحكومة تنفيذ سيناريو الفيلم الكوميدي "عايز حقي"،

السهم مجاني
و العيشة عجباني
و الي يزعل مني
يجي يقعد مكاني
انا اسف يا مصر لكن
كدة بقي كثير
يترسيني علي التيتة
يا تقليلي بعدين
انا منك برده يا أما
و متربي علي اديكي
انت فاهمة قصدي و لا صوتي مش واصل اليكي


بعد ايه بتقلي خد هو انا كنت قلت هات ولا اكمن اللقمة باشت ومبقتش تنفع تبات
بعد متمص خيرها و الي فاضل فيها مفيش
جي بترماهالي و تقلي من خيرها عيش

أسكندرية في صورتين

تاج خفيف علي قلبي من ماما
المنتزة

مارينا شاطيء 22

الصورة دي لايف مش فوتو شوب

و دي كمان مفيهاش اي لعب
بسيين الفور سيزون

وده لينك لجروب علي الفيس بوك فيه صور للأسكندرية من ايام الأبيض و الأسود و ماقبل صناعة الأحبار
دووووووس

مش عايز اتكلم تاني عن اسكندرية
لأني حاسس اني فعلا حبقي ممل
بس هو أختصار اسكندرية في صورتين
البحر و السماء

زي منت عايز انا عن نفسي دايس

اربع قضبان و في النص فانوس
يفيد بأيه النور في السجن يا منحوس
دي عيشة وارمة و السماء ضالمة
وانت كدة او كدة محبوس
آل اه بيقلي حرية
كتك ستين خيبة قوية
هو في قضية
و لا انت فالح بس ترددلي الأغنية
و تستني غيرك يمحي الامية

الله ير حمك يا أسكندر يا كبيييييييير
اترقو عليك و قالو سلمتها علي المفتاح والي مش متربي فيها ميرتاح
طب يفيد بأيه البحر و هو كله املاح
تفيد بأيه الشمس و هي من غير سقف يضلل علينا سلاح
و يفيد بأيه الموج و هو كل ما يقرب ينزاح
و يفيد بأيه القلم
و يفيد بأيه الكتاب
و يفيد بأيه الحرب والسياسة و السلام
و يفيد بأيه
و يفيد بأيه

فات المعاد

اسكندرية هي اسكندرية

انا المصري انا الكبير
انا الي لا بقع و لا بطير
انا الي متربي في حوريها
و شارب من مجاريها
انا الي لفيت ضوحيها
و برده رضيت بيها
انا الي عشقتها و حبتها
كأني كاتب عليها
اسكندرية
مكنتش ناوي اكتب في رمضان بس قريت مدونة بنيكة شاي
رجعتني لأيام ثانوي و الدروس
افتكرت ان مصر مش الدويقة و منشية ناصر و السلام 2000
و لا اسكنرية عزبة الرحمة و حجازي و الناس الي مش لقية تفطر في رمضان و بس
في وسط كل دول مصر لسة بخير
منهم و بيهم و عندهم ضحكنا و هزرنا و فرحنا بجد
لسة فيها عمو فؤاد و ابو نسمة وعم عباس لسة فيها رطوبة بحري و ريحة سمك الصيادين
لسة فيها تيسون لو خف جسمه كفاية اسمه و احجارة الكريمة في ليالي زمان في جليم علي البحر
لسة عبود ممامتش ولا حسن كوباية احتضر
لسة النورس فاتحة و الصباحي بتنزل شاي
لسة عايشة بدمها و ناسها
لسة بسمع ايووووووه من قبل مخش بحري
لسة فيها العجمي و البيطاش و الهانوفيل
لسة فيها ابوقير
و البحر الميت و جزيرة ويلسون و الحناطير
لسة اسكندرية اسكندرية
من ايام الأسكندر و هي اسكندرية
ليها لون تاني و ريحة تانية و شكل تاني و جو تاني
بمطرها بطينها ببحرها بقطرها بترعها بشورعها المتكسرة بعشوقيتها هي الاسكندرية
عمر ما العشوقيات نقصتها
ولا الأبراج زودتها و جملتها
جمال الأسكندرية في رحتها و لون سماها و لمعتها و ليلها و لسعة شتاها و حرارتها
جمالها كلها علي بعضها في تناقضتها
ولو لم اكن اسكندرانيا
مكنتش حتفرق معايا

شباب للتصدير

السلعة بالمفهوم الخاطيء؟

اولا
صراحة انا الي غبي
المواطن المصري مش رخيص هو غالي
بس زي اي سلع ثانية
محططلو ليمت وستج يعني( نافق)
يعني مش مهم يموت في اليوم كام واحد
الف في عبارة
كام واحد علي كرنيش اسكندرية كام اتوبيس علي الصحراوي ولا الزراعي ولا الساحل اشطة
و لما ركزت لقيت بعد كل كارثة بيتوستج فيها كتير بيلمو الليلة شوية علشان اليميت الي محطوط لعدد النافق ميزدش
ودي تجاريا بتعتبر خسارة
في مزارع الفراخ المعقول و الي ميقلقش علي كل الف فرخة كل يوم 2 و لا 3

ثانيا
المواطن المصري و بالأخص في اجمل و اعزب مراحل حياته
بيعتبر سلعة جيدة للتصدير
بيتزود بيها ميزان المتحصلات و بيقل بيها ميزان المدفوعات للدولة وده طبعا للحفاظ علي شكل الميزان التجاري الدولي للدولة يبقي متوازن و زي الفل
وده بيبان في فترة الاجازات في معظم مطارت الجمهورية العدد الهائل للشباب المتردد علي البلد
الغريب في الأمر ان الشاب المصري زي اي سلعة اخري قبل ميتصدر رسمي بيمر بفوحصات و بيخلصلو ورق زي ورق الجيش مثلا
و برده بيتصدر برا و بحرا و جوا
و في منهم الي بيتهرب علي مراكب
و الي بيطلع بأنفويس
يعني الشاب المصري يتشابه جدا مع اي سلعة تصدر عالميا
من تاريخ صنع(سنة التحرج)مثلا
و جودة فرز اول ولا ثاني ولا ثالث(التقدير مقبول،جيد)مثلا
بس ملهوش نفس درجة الحماية الي بتفرضها الحكومات علي السلع الي بتتصدر خارجيا
لذلك ارجو لو انا سلعة للتصدير
و اتكتبلي اتباع مبقاش وستج قبل مخلص مراحل انتاجي(منا لسة مخلصتش كلية)والا خدت ختم الجيش واستوفيت اوراقي الرسمية
ان تشرف عليا وزارة التجارة الخارجية لحين وصولي الي الأراضي المكتوبة عليا

نرجوعدالة التوزيع

هو انت فعلا امي و لا انا ابن حرام
انت ادري
انت الي عارفة
كنت بقول زمان انك بتربيني
و لما لقيت نفسي بكبر في جو زبالة كله ناس قالعة و بتشرب و بتعمل كل حاجة قال عليها ربنا حرام زي معلمتيني و انت راضية و ساكتة و بتحميهم و لو عملت زيهم حتحميني قلت بتمدينيني و تشخلعيني
لما كنت بمشي في شورعك وانا طهقان و مخنوق من الي حصل فيكي ولسة بيحصل كنت بستناكي تمدي ايدك و طبطبي عليا و ترحميني
كنت بكبر و بستناكي بقي تظبطيني و تجوزيني و تجهزيني وتشغليني و تخديني في حضنك وعمري مفكرت انك حترميني
ما انت الي ربتيني
اديني كبرت يا ماما
و خلاص كلها سنة و اتخرج
هو صحيح حتوظفيني
و في وحدة كدة معجب بيها بس ابوها بيقلي شقة
حتجوزيني
قوليلي طمنيني
مش بعتب عليكي ان شارعي بايظ يأمي الا لما شفت شارع اخوايا
ولا يوم زعلت من الضلمة والكتمة الا لما شفت النور متصلت علي اخويا
و لا في يوم حسيت بالجوع الا لما شفت الي بيترمي من علي سفر اخوايا
ولا يوم حسيت بالعطش الا لما شفت الي بيشربه اخويا
ولا يوم حسيت اني حيوان مهان الا لما شفت ازاي بيتعامل اخوايا
يا ماما مش كلنا اخوات و كلنا لينا نفس العنوان
فين عدالة التوزيع يأمي
ان مش ببص لحد
دا رزق
بس الرزق ده ميبقاش من عرقي وشقايا ودمي
انا لو عليا راضي
اكل الي يترميلي واشرب الي يتشورلي عليه
بس
ولادك زعلانين
ولاد البطة السودا تعبو
و بعتنلك
انت امنا ولا احنا ولاد حرام

سفينة نوح

مفيش حد فينا ميعرفش سيدنا نوح و لا سفينة نوح ولا قصة سيدنا نوح
بس مين فكر في عظمتها
لحد فترة قريبة كنت بعتبر سفينة نوح مجرد قصة بحب اسمعها لحين لأخر
لحد ما لأول مرة فكرت فيها
هو لولا سيدنا نوح مش كانت البشري انتهت؟
هو مش سيدنا نوح هو الي نقل الحضارة معاه علي السفينة دي؟
هو السبب في وجودي ووجودك دلوقتي
ايوة هو الي نقل الحضارة هو الي حط علي السفينة ذكر و انثي من كل مخلوق علي وجه الارض
هو الي واجه كلام الناس لما قالو في حد يبني سفينة في الصحراء بعيدة عن اي شط او اي مينا
قد كدة كان شخص متزن قوي مرن عارف هو عايز اه و ليه
و الأكثر من كدة ايمانه بالله سبحانه و تعالي
انه يكرث حياته لبناء سفينة ينقظ بيها البشرية
مكان ممكن يبني فلوكة و لا جي تي سكيت يتنقظ بيه لوحده ويمتلك الارض و ما عليها

يا تري ممكن نلاقي في زمنا نوح يفكر في الناس و ميفكرش في نفسه و بس
يفكر في النيل و الاهرمات و الاسكندرية و الاقصر و اسوان و مصر و ينسي كرسي مجلس الشعب و الحصانة و فيلا بورتو
يتري في حد حيكرس حياته بجد علشان يبني مصر ميبنيش عزبة ليه ولعياله و عيال عياله من بعده
يا تري في حد حتي حينفخ عوامة و يرمهلنا
بلاش
في حتي قيطان بجد حيقدر يرسينا علي اي مينا من موانينا
يضمنلنا بكرة و يحمينا و يرجعلنا جزء من كرمتنا
نفسي اعيش لحد مشوف نوح الالفية الثالثة
نوح الي بيفكر فينا مش الي يطلع علي كتفنا و يدوس علينا