سيد درويش زوروني كل سنة مرة

سيد درويش

ذلك الفنان الذي لن ولم يمحي اثره الزمن
الذي لم يكن فقط موسيقار عبقري بل هو ايضا أحد رواد الحركة التنويرية الذي عاشت بهدف واحد
مستقبل اجمل وأفضل لمصر
مش حننسي انه كان حشاش
ومش حننسي انه كان فلاتي من الدرجة الأولي
مش حنكر اني بعشق غزله في قرش الحشيش
يمكن يكون بيعوضني مزاجه الي عمري مجربته
مش حنكر تصريحاته عن جسد المرأة
مش حنكر انه قال اوعي يمينك
مش حسدق حد غيره في ايه العبارة
مش حلاقي حد احسن منه يفكرني اشد الحزام زي ميكون عايش معانا
مش حسرح غير في اهو ده الي صار
مش حتنطط غير في دنجي دنجي
مش حقف غير بقوم يامصري
مش حفرح غير بالعزوبية
و الحلوة دي وزروني كل سنة مرة وبصارة وطلعت يا محلي نورها
و نشيد بلدي الي ياما رددته كل يوم الصبح وغيره من عبقرياته
الراجل ده بالحشيش وي وي وي
عرف يقف قدام عدو صريح
بمدفعه و جيشه علي ارض مصر
غيره اخرهم يعملو اوبرت ولا يغنو مشربتش من نيلها
و يروحو امريكا يولدو هناك علشان الجنسية
امبارح كان الاحتفال السنوي لذكراه
شرفني اني اروح وسط اهله وناسه كوم الدكة علي اقرب نقطة من بيته ومن غرزته الي ياما شد فيها وطلع ابداع غنائي و نضالي
مش يهمني هو كان ايه انا مش ححاسبه ربنا الي بيحاسب
يهمني هو عملي اه
الفن رسالة و مش اي رسالة رسالة قوية
الحفلة كانت في الشارع زي اي فرح بلدي
شميت فيها ريحة اسكندرية وشربت كوباية شاي في قهوة في حواري حواري كوم الدكة
و سمعنا اغانيه باصوات جديدة بس لسة فيا ريحته العتيقة الي عمر الزمن ميمحيها
ده لينك سيد درويش علي الويكبيديا
يا ريت نعرف عظمة شخص عاش 31 سنة
عرف يعمل الي غيره معرفش يعمله في 60
من حب وعطاء ودعاء
الله يرحمك يا شيخ سيد
يا ريت ندعولو بالرحمة لأنه ميستهلش غيرها
و ربنا يكرمنا بسيد جديد يهون علينا ويصحنا