و انا شايل همي وقعت مني حبه حاجات
قعدت الملمها اتريها باقية من عمري اللي فات
عمري الي قضيته بالثواني مش بالساعات
عمري الي شلته و شالني و لفينا في شوارع وفي حارات
عمري الي طاوعني و لا عمري صديته
عمري الي جراني ولا عمري جريته
عمري اللي عمري في يوم ما سألته فين عمري وديته
و انا في طريقي قابلت شابه بشرتها خمرية
شعرها لؤلؤ اديها مرمر و كانت محنيه
علي البر الثاني و بتنادي بصوت مسموع
يا تقبلني علي عيبي يا نقفل علي الموضوع
أصل الي بينا وبختصارغنينا و بكينا و هزمنا لحظات الانتظار
علي القهوة ابتدينا أصل الحكاية
سكر زيادة و لا سادة
حكاوينا كانت ولادة
و صوت ضحكات الصبي ويا البنات
علي نكته حلوة أو حكاية من الزمن الي فات
و طوينا مر العمر جوه صفحات الذكريات
وضحكنا علي اللي فاتنا و حلمنا بما هو آت
و رسمتي علي خدودي بشفايفك النونوو
كتبتي علي جفوني مصر في عيوني
وسلمتيني الراية و حملتها بقوة
و الله يا بلدي الوجع من جوة