يمكن أرتاح

في حاجة ضايعة مني و بدور عليها
بدور جوة الناس برده مش لقيها
يمكن تكون دبلت
أو الزمن رفض يسقيها
بس انا حاسس ان في يوم ربنا حيحيها

يا أمي

أنا خايف اقرب ما اكون مرعوب

اصلي خلاص

بقيت قالب طوب

لا بحس ولا بتوجع

بس بتكسر و بدوب

يا أمي خلاص الدموع الي جوايا تغسل أجدعها ذنوب

و الرحمة الي زرعتيها بأديكي بقت بالمقلوب

يأمي الناس بقت مش زي الناس

مفيش حب مفيش احساس

يأمي الزمن دلوقتي مبقاش تبوس و تتباس

بقي يا تدوس يا تداس

وهية دي عيشة يا نااااااس

ضميني يمكن ارتاح

شيء من بعيد

يا قاهرة المعز يا مدينتي

هواءك نسيم و ترابك جنتي

لن تقهري ابدا ما دمت حيا

و لن تموتي الا بعد دفنتي

عفوا

ايتها المدينه المتحركة

ايتها السريعة

مجهولة النسب

رغم اختلاف الجنسيات

و اختلاف العروق و اللغات

هل انت الحياة ام انت الممات

هل انت المحبوبة التي تغنت بك الكلمات

ام انت كذبة من أصعب الكذبات

لن اتعجب من اختلاف المسميات

لكن اتعجب

كم من مقاتل من اجلك قد مات

و كم من طامح في سحر نيلك قد اتته المهلكات

!!!!!!اتعجب

اهي سكة وخلاص

هو الطريق من تحت زي الطريق من فوق

أعتذر

أعتزر لكل من عاق طريقي و أبكيته
و داس علي قلبي و عديته
و بكي عنيا و حبيته

أعتذر لكل من نداني و لبيته
و كل من علمني القسوة و كان اول من هدمته و افنيته

أعتذر لقلبي الذي أقبل علي الأنتحار
و لمشاعري و ما أصابها من اضرار
و لتفكيري الذي اعتاد علي نظرية المؤامرة و الأنحدار

أعتذر لكل من كان يد العون لي
و لكل من كنت جمره لهب تعذب ايامه و لياليه

أعتذر الي الله القوي الغفار الذي اهداني من نعمه الكثير
و فعلت بها ما لا يرضيه

نداء
الي كل أحمق أبله عتيه
ظن انه القوي الذي لا يقهره الزمان
و لكل من رأي انه يمتلك البلاء و الدهاء
ولكل من أحل مال لايملكه
و أتخد طريقا اعرج يسلكه
ان الله قريب يسمع دعوة المظلوم مجيب
لا تنتظر عضب الله كي تميل الي الصحيح
و تستغفره و انت من شدة الألم تصيح
فالله عز و جل يقول في كتابه الذي لا يأتيه الباطل من بين يديه ولا من خلفه
(ادعوني استجب لكم)

ونداء لكل مستضعف مقهور
أعلم
فوالله لو اجتمع الإنس والجن على أن ينفعوك بشيء لن ينفعوك إلا بشيء قد كتبه الله لك
ولو اجتمعوا على أن يضروك بشيء فلن يضروك إلا بشيء قد كتبه الله عليك

الجأ إلى من بيده تصريف السماوات والأرض
ولا تخاف هيبة الايام
و لا تحسب حسابات الأزمان
فسبحان الله مقسم الأرزاق

ححكي

ححكي و أقول
ليلي لو كان حزين بيعدي و بطوله
يطلع نهاره عيد وأضحك علي زهوله

ححكي و أبكي علي الي صار و الي كان
و الي جي كمان

ححكي حكاية ليل ضاع منه القمر
وححكي حكاية نهار طالع من بعد سهر

ححكي حكاية الأنا و ححكايها في كل مكان
ححكي و لو مسمعش حد مني الكلام

ححكي لقلبي عن معني حب عمره معاش
و ححكي لعمري عن طريق منتهاش



ححكي لنفسي و أعزيها
عن موت أقرب ما كان ليها

ححكي و أبكي للزمن و الدنيا و الأيام
عن حاجة ضاعت مني ومش عارف بكام

ححكي

الي من يهمه الأمر

رسالة من الزمن
بتقول
يا أنسان يا عاشق يا ولهان
يا ناسي يا جبان
يا قاسي يا حيوان
فينك بين الخلق و انت مش سامع آذان
نسيت زمان
نسيت الحب
الوطن
العدو
الحبيب
الحرب
نسيت الأمان
نسيت أنك مهما كبرت أنسان
دا الحجر أتكلم وجرح الي داس عليه بالأقدام
و البحر خرج عن طوعه وطلع لكل مكان
و النار شقت جبل خرجت لغم يصحيك من المنام
و أنت
زي ما أنت بدور علي الأيام
علي لقمة حاف و لحاف
وناسي مقسم الأرزاق


خلاص يا زمن
وفيتي بعهدك يا ليالي
وبتدفعينا ثمن
غدر الأيام بالغالي
تعبت من الليالي و من النهار الي مالو عنين
تعبت يا قمر من نورك الي مش عارف راح فين
تعبت و الأمل بقي أمل بندور عليه

دور تلاقي
بسمتك بتداوي دمعتك بضحكتك
بس فكر وشوف

مين الي غاوي كسرتك

بدون تعليق

دائما و أبدا تلعب بنا الأقدار و تعلمنا أن الأيام ليست ملك لنا و أن الأبتسامة شيء ليس من حقنا
أخبرتني في تلك اللحظة أن الأيام ما هي الا ذكري للايجار يدفع ثمنها من الأعمار

دائما و أبدا أراك كعادتك تبتسم لكل طفل صغير وتبكي لكل شيخ أكف عالق في الطريق

دائما و أبدا أنظر الي عيناي في المرآه كي أراك و أتنفس دخان سجارتي كي تهون عليا ذكراك

هل تعلم ان تلك المرأة التي تخبرني أن هاتفك النقال قد يكون مغلق تبث الي قلبي نبض هذه الحياه


لكن

وداعا يا صديقي
دوما
غنينا
خدني يا حبيبي علي بيت ما له ابواب
كا ترجع الليالي و يرجع الأحباب

قلنا الفرحة الطريق

انا فعلا مش عارف أعيش من بعد ضحكتك
من بعد همستك
الكام يوم الي فاتو عدو عليا سنين

بحاول أنور لنفسي طريق

بس كل الدروب هي درب واحد يا صديقي

كنا متفقين ان مفيش صاحب

بس

وجودك كان فارق بالرغم من الأسابيع الي مبسمعش فيها صوتك

كل حاجة بتفكرني بوجودك

فيروز
طريق المطار الي كنت لازم تعديني عليه كل يوم هروبا من زحمة كبري قناة السويس

بحسك جنبي بسكونك بهدؤك
بضحكتك و كلمتك الي كانت بتفتح في عقلي طريق
و بتعدي بيا بحر غريق

وداعك أيها الأنسان
في رعاية الله
و أمنه

صندوق الدنيا

قهوة من غير وش
ودنيا مليانا جراح
و دموع مبتنزلش غير في الافراح
و أهي لفت الأيام رجعت لينا الليالي
نادتني بأعلي صوت بكرة راجع تاني



صندوق الدنيا وفيه قلبي انحشر
صور بتدور حقيقة ولا حجر
و ستارة سوداء عزلاني عن البشر
ده بيضحك وده بيبكي و ده مستني القدر

صندوق الدنيا ده مش عباره عن صندوق بتلف فيه الصور
صندوق الدنيا ده صندوق العبر
كوكب عايشين فيه كلنا
صور مركبنها بأسمنا و اغنية بنغني فيها لعمرنا
و الستارة السودا دي هي الي بتنسينا نفسنا
هي الي بتعيشنا وهمنا وبتخلينا نقسي علي كل الي يقرب مننا
لحد أمتي العدسة حتفضل هي الي بتجمعنا و تلمنا
هي الي تخلينا نحضن بعضنا و تضمنا
لحد أمتي

كل سنة

كل سنة
و انت طيبة
و انت بخيرك
و انت حرة

كل سنة
و ولادك يحبوكي
ويخافو عليكي
وعمرهم ميكرهوكي

كل سنة
و انت شمسك نور
و قمرك حب
و نجومك دليل
وليلك حنان
ونهارك أمان
و نيلك حياة
و بحرك مينا

كل سنة و انت طيبة يامصر

كل سنة و أنت طيبة يا أمي

كل سنة و انت طيبة لكل
ام في غزة
في العراق
في دارفور

كل سنة وأنت طيبة يا
مجداوية

كل سنة و أنت طيبة يا
أم يوسف

كل سنة و انت طيبة يا كل أم
تستاهل لفظ ام
انجبت ام لم تنجب

كل سنة و أنا طيب
و عايش تحت رجلك يا امي
و عايش تحت رجلك يا مصر
بحبك و انا شايل في قلبي
بس بحبك
و مستني اشارتك
كل سنة و أحنا كلنا طيبين

رسالة من عاطل

سمعت حبة كلام خلوني منام
سمعت كلام قساني و نزل دمعتي و قطع لساني
مبقتش عارف أفكر بدماغي
يعني تخطفي اكل عيشي و تديه لواحد تاني
يعني علشان أمركاني و لا ألماني و لا يباني

يا مصر حقولهالك تاني كده كتير
مش كفاية معيشاني أطرش و ضرير
لا عارف أسمع كلمة لأ و لا قادر أشوف تغير
و كمان هي آه الأنسانية الي أنت مستخسراها فية
أني أكل لقمة نضيفة و أعيش عيشه هنية
دي حتي العشة الي ببنيها بتهديها فوقيا
و لقمة عيشي مستخسراها فيا
و الكلمة الحلوة مبتقوليهاش ليا
و الشكوة بتعمليهالي قضية
أقولك أنا بقا علي الي فيا

أوعي تقوليلي استني شوية

أنا الشتا بالنسبالي كابوس
و اساسي البرد دا شيء محسوس
و لقمة الفول بقت عايزة فلوس

مش بقلك شحتيني و لا مني عليا
أنا كل الي عايزوه اشتغل بأديا
بدل متجيبي حد تضحكيه عليا
و ياكل أكلي وأكثر شوية
و تقوليلي عمالة اجنبية

مازلت

مرت سنين علينا و احنا بنفتكر
هو احنا متنا بدري و لا احنا بحتضر

مازلت ابحث عن تلك اليد الخفية التي تريد أنارتي
و لازلت أعرف اليد القبيحة التي تريد كسرتي

مازلت ألم بزمام أموري
مازلت قادر علي رفع اعضائي بواسطة قدمان

مازلت قادر علي بعث بسمتي اينما شئت
و تقيد دمعتي و قتما شئت

مازلت ابحث عن درب به ماء
و عن سكن به دواء

مازلت أري أن البحر الهاديء لا ينجب بحارا
و السفينة المثقوبة مكانها القاع

مازلت اشكر الله علي ما أهداني
و أحمده علي ما وهبني من صبر و أعطاني

مازلت كما أنا
لم تغير الايام ملامحي بل أثقلت بروزها
ولم تقتص الأقدار مخالبي بل اكثرتها حدة

البحر بحري

حكالي جدي زمان عنك يا مصر و قلهالي
تربها عنبر ونيلها ساري و جاري
لايوقفو الزمن و ولا تجور عليه الليالي
عفوا
أنا ليا رأي تاني
رجعتلك تاني يا سكندريتي
روتينك ليه شكل تاني
حتي جوك يوم برد بارد
و يوم برد هادي
و يوم برد جامد
و كمان أسكندرية مش محتاجة ابص علي نشرة أخبار
أنا اطلع أبص علي كام موجة
أعرف هي ناويه علي أيه
و زي كل يوم
مش كل يوم قوي يعني
حلفت مش حنزل من بتنا غير علي بحري
دا كان وعد و عدتو لتيسون أن أخر حجر ليا في أسكندرية بأمضاءك
و أول حجر تحت أشرافك
مهيه ريحة بحر بحري
و سمك الأنفوشي ميروحش ولا ميحلوش من غير رصته
و كالعادة منذ نعومة اضافري نفس التريب الي بنقع فيه
نشوي السمك و نشتري الطواجن
و كل واحد يقول سمك
عربيتي لأ
لأ
لأ
و ناكل علي الرصيف احنا و القطط و بحري كلها
بس الأكل بيبقي ليه طعم تاني
و خصوصا لما يكون شبانة موصي أشرف علي النار انه يعمله بواسير
و نروح نطفي الحريقة دي بواحد رز بلبن سادة واواحد مكسرات جلاتي فنليا من عند عزة
و نطلع بيه فلوكة ابو أيه نورماني الثالث عشر
و يقلنا لو كنتو بدروتو نص ساعة كنت طلعتكم مع الوفد الروسي
و هي أساسا بتاخد 5 بستر ربنا
و بعد نص ساعة أو بعد ميخلص السجاير الي معنا أيهما اقرب يقلنا البحر عالي
و ينزلنا عند فسحايت القلعة من ورا
نقعد علي الصخر وكل مرة يقلنا علي حكايه شكل عن القلعة اخرها النهاردة البلوكة الي مكتوب عليها المقاولين العرب
مكنش بيعرف عم قايت باي يفكر غير و هو قاعد عليها و نصدقه
و يقعد يحكي عن الانجليز و عن حكاوي جده عن الفرنسيين و الملك اطال الله عمره
و احنا مستمتعين
و نجيب في سيرة المدرسة و المدرسين والمدرسات الأحياء منهم و الأموات
طبعا ابو ريان و علي براد سوري وراط مبيتسبوش في حالهم
و الازم رامي و فاتح يختلفو علي نفس النقطه هل ابو ريان ربانا و لا بهدلنا و رمانا
و نتكلم في السياسة و الدين
و نعبر صور القلعة علشان نرجع و فاتح يتزحلق بس الحمد الله المرادي مفيش مفاتيح و قعت في البحر
و نرجع علي الشيخ و فيق و صواريخ
و نشتري علبة كولورتس و شريت انسوسيد من بتاع الأسهال من صيدلية الانفوشي
و نزف العرايس و زي كل مرة أبوصابر يوجب مع غزال و يخليه يرقص في الزفة
بس مش اي زفة
زفة اسكندراني في بحري
و يقع و يدحك الناس عليه
و علينا
و نطلع في الاخر شباب تيكي تيكي من الي بتورح و مبتعرفش تيجي
و نرجع علي كارلوس سيدي جابر نسهر لحد الفجر و ننزل نقف علي كبري استانلي نزاول حسن براد بتاع الشاي و هيما حرنكش
و نصلي الفجر في القائد ابراهيم و برده نرجع نقف علي البحر
مهي دي اسكندرية
البحر

حدوتة مصيرية

الحكمة قتلتني وحيتني وخلتني أخاف عليكي يا مصر
وأحكيلك علي المكنون
من الي عاقل فينا مين مجنون
مين الي ظالم فينا مين مظلوم
من الي مبيعرفش غير كلمة نعم

مصر
اتغيرتي قوي يا بلدي ومبقتش عرفلك نظام
لا حاسس فيكي بالبرد الي بحس فيه الدفا
ولا الدفا الي بحب فيه الأمان

امتى اتزرعت مبانى
وناس بشكل تانى
وادوار من غير معانى

امتي اتولد الظلم و اتربي بين ادينا
ومحسناش في يوم انه حيكبر علينا

امتي الصمت كان بيقدر يكسر ضلع فينا

و من امتي بنشوف الأمل بيضيع
و مبتبكيش عنينا

احنا اتغيرنا يا مصر ولا انتي الي غيرتينا
هديتي حلنا ولا بتقوينا
قتلناكي ولا قتلتينا

مش فاضل كثير يا مصر
قوليلنا علي المطلوب

نحضر الشنطة ولا نستني نرمي الطوب


حدوتة مصرية